لاہور (رم نیوز)پنجاب بدستور شدید سموگ کی لپیٹ میں ہے جبکہ لاہور ایک بار پھر فضائی آلودگی کے لحاظ سے دنیا بھر میں سرفہرست شہر بن گیا۔لاہور کا ایئر کوالٹی انڈیکس (AQI) 379 تک جا پہنچا جبکہ لوئر مال کے علاقے میں یہ سطح خطرناک حد 743 ریکارڈ کی گئی۔ دیگر شہروں میں گوجرانوالہ کا اے کیو آئی 280، فیصل آباد 251، ملتان 210، سیالکوٹ 184 اور پشاور میں 196 ریکارڈ کیا گیا۔

پنجاب حکومت اور محکمہ ماحولیات نے سموگ کے تدارک کے لیے کارروائیاں تیز کر دی ہیں۔ آلودگی پھیلانے والے درجنوں صنعتی یونٹس اور فیکٹریاں سیل کر دی گئیں جبکہ 41 جدید ایئر کوالٹی مانیٹرنگ سسٹمز فعال کر دیے گئے ہیں۔ ساتھ ہی ڈرون اسکواڈز تعینات اور "سموگ فری زونز" قائم کیے گئے ہیں۔

سینئر وزیر پنجاب مریم اورنگزیب نے کہا کہ صاف فضا ہر شہری کا بنیادی حق ہے، حکومت پائیدار اقدامات کے ذریعے سموگ کے مستقل خاتمے کے لیے پرعزم ہے۔ادھر محکمہ موسمیات کے مطابق کل سے لاہور میں بارش کا امکان ہے جس سے فضائی آلودگی میں کمی متوقع ہے۔