اسلام آباد(رم نیوز)صدرِ مملکت آصف علی زرداری نے کہا ہے کہ پاکستان کو درپیش سکیورٹی چیلنجز کا مقابلہ تبھی کیا جا سکتا ہے جب قیادت باخبر ہو، قوم متحد ہو اور پالیسی سازی مربوط انداز میں کی جائے۔ وہ نیشنل ڈیفنس یونیورسٹی میں 27ویں نیشنل سکیورٹی ورکشاپ کی اختتامی تقریب سے خطاب کر رہے تھے۔

ورکشاپ میں پارلیمنٹ، سول و ملٹری اداروں، تعلیمی حلقوں اور سول سوسائٹی کے نمائندوں نے شرکت کی، جس کا مقصد قومی طاقت کے مختلف پہلوؤں اور جامع قومی سلامتی کے فریم ورک کی فہم کو مزید گہرا کرنا تھا۔ صدر نے شرکاء کو ورکشاپ مکمل کرنے پر مبارکباد دیتے ہوئے قومی سلامتی کے شعور کو مضبوط بنانے کیلئے ان کی کوششوں کو سراہا۔

اختتامی تقریب میں صدر زرداری نے کامیاب شرکاء میں اسناد بھی تقسیم کیں۔ آئی ایس پی آر کے مطابق یہ ورکشاپ قومی سطح پر مکالمے کے فروغ اور مشترکہ سکیورٹی حکمتِ عملی کی تشکیل کا مؤثر پلیٹ فارم ہے۔