راولپنڈی(رم نیوز)سیکرٹری داخلہ و نارکوٹس کنٹرول نے وفاقی تحقیقاتی ادارے (ایف آئی اے) کے متعدد افسران اور اہلکاروں کے خلاف احتسابی کارروائی مکمل کرتے ہوئے مختلف سزائیں دینے کے احکامات جاری کر دیے۔یونان کشتی حادثہ 2023 اور دیگر معاملات میں غفلت، بدعنوانی اور غیر پیشہ ورانہ رویے پر کئی افسران برطرف ہوئے جبکہ متعدد کی اپیلیں مسترد کر دی گئیں۔

ذرائع کے مطابق سیکرٹری داخلہ نے کیسز کا کیس ٹو کیس جائزہ لیا۔ کراچی ایئرپورٹ کے ایک ڈپٹی ڈائریکٹر اور دو اسسٹنٹ ڈائریکٹرز، اور فیصل آباد ایئرپورٹ کے ایک اسسٹنٹ ڈائریکٹر کو یونان کشتی حادثہ میں غفلت کے الزامات پر برطرف کیا گیا۔ملتان ایئرپورٹ پر تعینات ڈپٹی ڈائریکٹر کو انسانی اسمگلرز سے مبینہ روابط پر 3 سال کے لیے عہدے اور تنخواہ میں کمی کی گئی۔ ناقص تفتیش اور غفلت پر دیگر افسران، اسسٹنٹ ڈائریکٹرز اور انسپکٹرز کو مختلف مدتوں کے لیے تنخواہ یا سینشور کی سزائیں دی گئیں۔

6 سب انسپکٹرز، ایک اے ایس آئی، 3 ہیڈ کانسٹیبلز اور 5 کانسٹیبلز کی اپیلیں مسترد کی گئیں اور نوکری سے برخاستگی برقرار رکھی گئی۔ اس کے علاوہ سپرنٹنڈنٹ اور سب انسپکٹر کی اپیل پر پروموشن روکنے کی سزا کو سینشور میں تبدیل کیا گیا۔