اسلام آباد(رم نیوز)صدرِ مملکت آصف علی زرداری نے تھائی لینڈ کے قومی دن کے موقع پر جنوبی صوبوں میں آنے والے شدید سیلاب پر ہمدردی کا اظہار کیا ہے اور متاثرہ عوام کے لیے نیک تمناؤں کا پیغام دیا ہے۔صدر زرداری نے کہا کہ پاکستان مشکل وقت میں تھائی عوام کے ساتھ کھڑا ہے اور موسمیاتی تبدیلیاں خطے کو شدید متاثر کر رہی ہیں۔ انہوں نے مشترکہ اقدامات کی ضرورت پر زور دیا اور تھائی لینڈ کے قومی دن پر دلی مبارکباد پیش کی۔صدر مملکت نے کہا کہ پاکستان اور تھائی لینڈ کے تعلقات دیرینہ دوستی اور باہمی احترام پر مبنی ہیں، اور دونوں ممالک علاقائی فورمز پر یکساں موقف رکھتے ہیں۔ انہوں نے خطے میں امن و استحکام کے فروغ کے لیے تھائی لینڈ کی کوششوں کو سراہا اور مذاکرات، تجارت اور عوامی رابطوں میں اضافے کی اہمیت پر زور دیا۔

صدر زرداری نے کہا کہ پاکستان خطے میں ہم آہنگی اور اجتماعی فلاح کے اقدامات کی حمایت جاری رکھے گا اور پاکستانی عوام کی طرف سے تھائی عوام کے لیے امن و خوشحالی کی نیک تمناؤں کا اظہار کرتا ہے۔