اسلام آباد(رم نیوز)وزیراعظم شہباز شریف نے موسمِ سرما میں گھریلو صارفین کے لیے گیس فراہمی بہتر بنانے کی ہدایت جاری کر دی ہے۔ قومی اسمبلی میں اظہارِ خیال کرتے ہوئے وفاقی وزیرِ پیٹرولیم علی پرویز ملک نے بتایا کہ وزیراعظم نے صبح 5 بجے سے رات 10 بجے تک گھریلو صارفین کو بلا تعطل گیس فراہم کرنے کا حکم دیا ہے۔

وفاقی وزیر نے کہا کہ اس سال گزشتہ سال کے مقابلے میں گیس لوڈشیڈنگ میں واضح کمی آئی ہے۔ تاہم جہاں بھی گیس پریشر کا مسئلہ درپیش ہے، متعلقہ علاقے کی نشاندہی کی جائے تاکہ فوری طور پر مسئلہ حل کیا جا سکے۔

علی پرویز ملک نے بتایا کہ نومبر کے دوران 80 سے 90 ہزار شکایات موصول ہوئیں، جن میں سے 70 سے 80 فیصد شکایات اوگرا کے دائرہ اختیار سے متعلق تھیں۔ ان کا کہنا تھا کہ زیادہ تر شکایات 36 گھنٹوں کے اندر حل کر دی گئیں۔