راولپنڈی(رم نیوز)پاک بحریہ نے شمالی بحیرہ عرب میں سطح آب سے فضا تک مار کرنے والے میزائل کے فائر پاور کا شاندار مظاہرہ کرتے ہوئے اپنی بھرپور جنگی صلاحیت اور آپریشنل تیاری کا عملی ثبوت پیش کر دیا۔آئی ایس پی آر کے مطابق پاک بحریہ نے ایف ایم 90 این ای آر سطح آب سے فضا تک مار کرنے والے میزائل کی کامیاب لائیو فائرنگ کی، جس کے دوران تیز رفتار فضائی اہداف کو انتہائی درستگی کے ساتھ نشانہ بنایا گیا۔

ترجمان کے مطابق یہ کامیاب لائیو فائرنگ پاک بحریہ کی جدید دفاعی صلاحیت، پیشہ ورانہ مہارت اور ہر وقت تیار رہنے کے عزم کی عکاس ہے۔فائر پاور کے اس مظاہرے کا مشاہدہ کمانڈر پاکستان فلیٹ ریئر ایڈمرل عبدالمُنِیب نے کیا، جنہوں نے پاک بحریہ کی آپریشنل تیاری پر اطمینان کا اظہار کیا۔

کمانڈر پاکستان فلیٹ نے مشق میں حصہ لینے والے افسران اور جوانوں کی پیشہ ورانہ صلاحیت، عزم اور لگن کو سراہتے ہوئے کہا کہ پاک بحریہ ملکی سمندری دفاع اور قومی بحری مفادات کے تحفظ کے لیے ہر صورت پرعزم ہے۔انہوں نے اس عزم کا اعادہ کیا کہ پاک بحریہ کسی بھی چیلنج سے نمٹنے کے لیے ہمہ وقت مکمل طور پر تیار ہے۔