کراچی(رم نیوز)جناح انٹرنیشنل ایئرپورٹ سے موسمی خرابیاں، تکنیکی مسائل اور کم مسافروں کے سبب مختلف ایئرلائنز کی کل 15 پروازیں منسوخ کر دی گئی ہیں، جس سے مسافروں کو شدید مشکلات کا سامنا کرنا پڑا۔ذرائع کے مطابق منسوخ ہونے والی پروازوں میں ڈومیسٹک اور انٹرنیشنل دونوں روٹس شامل ہیں۔ پی آئی اے کی کراچی سے لاہور شام 7 بجے روانہ ہونے والی پرواز PK-306 اور لاہور سے کراچی آنے والی PK-307 منسوخ کر دی گئی ہیں، جبکہ کراچی سے ملتان جانے والی PK-330 بھی آپریٹ نہیں ہوئی۔

نجی ایئرلائن کی کراچی سے لاہور اور اسلام آباد جانے والی کئی پروازیں بشمول 145، 146، 123، 124، 141 اور 404 بھی منسوخ کر دی گئیں۔ انٹرنیشنل پروازوں میں ایتھوپین ایئر کی کراچی سے ادیس ابابا، سلام ایئر کی کراچی سے مسقط اور گلف ایئر کی کراچی سے بحرین (750 اور 751) کی پروازیں شامل ہیں۔ایئرپورٹ ذرائع کا کہنا ہے کہ پروازوں کی منسوخی کے باعث مسافروں کو طویل انتظار اور متبادل انتظامات میں مشکلات کا سامنا کرنا پڑا ہے۔