اسلام آباد (رم نیوز)دفتر خارجہ کے ترجمان نے کہا ہے کہ پاکستان کو سرحد پار سے سرگرم دہشت گرد عناصر کی جانب سے مستقل خطرات درپیش ہیں، جبکہ بعض دہشت گرد گروہوں کو پاکستان مخالف عناصر کی پشت پناہی بھی حاصل ہے۔

ترجمان کے مطابق دہشت گردی کے خلاف جنگ میں پاکستان دنیا کے سب سے زیادہ متاثر ہونے والے ممالک میں شامل ہے، جہاں اب تک دہشت گردی کے نتیجے میں 90 ہزار سے زائد قیمتی جانوں کا نقصان ہو ا ہے۔

انہوں نے کہا کہ پاکستان کی قربانیاں اس کے دہشت گردی کے خلاف غیر متزلزل عزم کی عکاس ہیں، جنہوں نے نہ صرف پاکستان بلکہ پورے خطے میں امن و استحکام کے لیے اہم کردار ادا کیا۔

ترجمان نے سانحہ آرمی پبلک سکول کا حوالہ دیتے ہوئے کہا کہ معصوم بچوں کی قربانی دہشت گردی کے خلاف قومی عزم کی ناقابلِ فراموش علامت ہے۔ ان کا کہنا تھا کہ سکیورٹی فورسز اور قانون نافذ کرنے والے ادارے دہشت گردوں کے خلاف فیصلہ کن اور مؤثر کارروائیاں جاری رکھے ہوئے ہیں۔

دفتر خارجہ کے ترجمان نے واضح کیا کہ پاکستان دہشت گردی کے مکمل خاتمے کے لیے پرعزم ہے اور عالمی برادری سے مطالبہ کیا کہ وہ پاکستان کی قربانیوں اور کوششوں کا اعتراف کرتے ہوئے تعاون کو مزید مضبوط بنائے۔