دبئی(رم نیوز)انڈر 19 ایشیا کپ کے فائنل میں پاکستان نے روایتی حریف بھارت کو 191 رنز سے شکست دے کر شاندار انداز میں ٹائٹل اپنے نام کر لیا۔348 رنز کے بڑے ہدف کے تعاقب میں بھارتی ٹیم 26.2 اوورز میں 156 رنز بنا کر آؤٹ ہو گئی۔ بھارت کی جانب سے دیپیش دیویندرن 36 رنز کے ساتھ نمایاں رہے، جبکہ سوریا ونشی 26، ارون پٹیل 19 اور ارون جارج 16 رنز بنا سکے۔ دیگر کھلاڑی خاطر خواہ کارکردگی دکھانے میں ناکام رہے۔

پاکستان کی جانب سے علی رضا نے شاندار بولنگ کا مظاہرہ کرتے ہوئے 4 وکٹیں حاصل کیں، جبکہ محمد صیام، عبدالسبحان اور حذیفہ احسن نے 2، 2 کھلاڑیوں کو آؤٹ کیا۔قبل ازیں دبئی میں کھیلے گئے فائنل میں بھارت نے ٹاس جیت کر پہلے فیلڈنگ کا فیصلہ کیا، تاہم پاکستان نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر 347 رنز بنائے۔

پاکستان کی اننگز میں سمیر منہاس نے شاندار بیٹنگ کا مظاہرہ کرتے ہوئے 17 چوکوں اور 9 چھکوں کی مدد سے دھواں دھار 172 رنز بنائے، وہ ٹورنامنٹ کے ٹاپ اسکورر بھی رہے۔ احمد حسین نے 56، عثمان خان نے 35، کپتان فرحان یوسف نے 19 اور حمزہ ظہور نے 18 رنز بنائے، جبکہ محمد صیام اور نقاب شفیق ناٹ آؤٹ رہے۔

بھارت کی جانب سے دیپیش دیوندرن نے 3 جبکہ کھیلان پٹیل اور ہینل پٹیل نے 2، 2 وکٹیں حاصل کیں۔پاکستان کی شاندار فتح پر صدر مملکت آصف علی زرداری، وزیراعظم شہباز شریف اور وزیراعلیٰ پنجاب مریم نواز نے ٹیم کو مبارکباد دی۔ فائنل جیتنے کے بعد چیئرمین پی سی بی محسن نقوی نے بھی کھلاڑیوں کو گلے لگا کر کامیابی پر سراہا۔