اسلام آباد(رم نیوز)ملک کے مختلف علاقوں میں شدید دھند کے باعث حدِ نگاہ کم ہو گئی جس کے نتیجے میں موٹرویز کو مختلف مقامات سے بند کر دیا گیا ہے۔ موٹروے ایم 2 لاہور سے کوٹ مومن تک، ایم 3 لاہور سے درخانہ، ایم 5 ملتان سے ظاہر پیر تک اور ایم 4 پنڈی بھٹیاں سے عبدالحکیم تک بند ہے۔ترجمان موٹروے پولیس کے مطابق سیالکوٹ موٹروے ایم 11 بھی مکمل طور پر بند کر دی گئی ہے جبکہ قومی شاہراہوں پر بھی دھند کے باعث ٹریفک کی روانی متاثر ہے۔ شہریوں کو غیر ضروری سفر سے گریز کرنے کی ہدایت کی گئی ہے۔