بغداد(رم نیوز)صدر مملکت آصف علی زرداری نے عراق کے دارالحکومت بغداد میں زیاراتِ مقدسہ پر حاضری دی اور امتِ مسلمہ کے امن، اتحاد اور سلامتی کے لیے خصوصی دعائیں کیں۔ انہوں نے حضرت شیخ عبدالقادر جیلانیؒ، امامِ موسیٰ الکاظمؒ، امامِ محمد التقیٰ الجوادؒ اور امامِ اعظم ابو حنیفہؒ کے روضوں پر فاتحہ خوانی اور دعا کی۔

صدر زرداری نے زائرین کی کتاب میں اپنے تاثرات درج کیے اور ائمۂ اہلِ بیتؑ کی تعلیمات کو علم، صبر، حکمت اور اعلیٰ اخلاقی اقدار کا سرچشمہ قرار دیا۔ اس دوران انہوں نے مزارات کے منتظمین اور مبلغین سے ملاقاتیں بھی کیں اور انتظامات پر اطمینان کا اظہار کیا۔ یہ دورہ بین المذاہب ہم آہنگی اور اسلامی ورثے سے وابستگی کے عزم کی عکاسی کرتا ہے۔