ڈھاکہ(رم نیوز)بنگلہ دیش کی سابق وزیراعظم اور ملک کی پہلی خاتون سربراہِ حکومت خالدہ ضیاء کی نمازِ جنازہ آج ڈھاکہ میں ادا کی جائے گی، جس کے بعد انہیں قومی اعزاز کے ساتھ سپردِ خاک کیا جائے گا۔خالدہ ضیاء کے انتقال کے بعد بنگلہ دیش میں تین روزہ قومی سوگ کا اعلان کیا گیا ہے۔ ان کی نمازِ جنازہ پارلیمنٹ ہاؤس کے سامنے ادا کی جائے گی، جس میں سپیکر قومی اسمبلی ایاز صادق پاکستان کی جانب سے شرکت کریں گے۔

سابق وزیراعظم کو ان کے شوہر اور سابق صدر جنرل ضیاء الرحمان کے پہلو میں دفن کیا جائے گا، جبکہ اس موقع پر سکیورٹی کے خصوصی انتظامات کیے گئے ہیں۔نمازِ جنازہ میں پاکستان سمیت مختلف ممالک کے سربراہانِ مملکت اور اعلیٰ سطحی وفود کی شرکت متوقع ہے۔

واضح رہے کہ خالدہ ضیاء طویل عرصے سے جگر کے عارضے سمیت دیگر بیماریوں میں مبتلا تھیں اور ڈھاکا کے ایک ہسپتال میں زیر علاج تھیں۔ وہ گزشتہ روز انتقال کر گئیں۔ خالدہ ضیاء بنگلہ دیش کی پہلی خاتون وزیراعظم تھیں، جبکہ مسلم دنیا میں بے نظیر بھٹو کے بعد دوسری خاتون وزیراعظم ہونے کا اعزاز بھی رکھتی تھیں۔ انہوں نے 1991 سے 1996 اور 2001 سے 2006 تک وزیراعظم کے طور پر خدمات انجام دیں۔