لاہور (رم نیوز)پاکستان کرکٹ بورڈ نے پاکستان سپر لیگ (پی ایس ایل) کے آئندہ سیزن سے قبل ملتان سلطانز کو فروخت کرنے کا فیصلہ کرلیا ہے۔ ذرائع کے مطابق دو نئی ٹیموں کی کامیاب نیلامی اور سرمایہ کاروں کی غیر معمولی دلچسپی کے بعد پی سی بی نے ملتان سلطانز کی بھی آکشن کا فیصلہ کیا ہے۔

ذرائع کا کہنا ہے کہ پی سی بی نے پہلے پاکستان سپر لیگ 11 میں ملتان سلطانز کے معاملات خود چلانے کا اعلان کیا تھا، تاہم نئی پیش رفت کے تحت اب فرنچائز کو فروخت کرنے کا ارادہ کرلیا گیا ہے۔ دو نئی ٹیموں کی ریکارڈ قیمت پر فروخت کے باعث پی سی بی کو توقع ہے کہ ملتان سلطانز بھی بہتر قیمت میں فروخت ہوگی۔

ذرائع کے مطابق ملتان سلطانز کی اوپن بڈنگ کی جائے گی، جس کے لیے جلد اشتہار جاری کیا جائے گا، جبکہ قانونی پہلوؤں کا جائزہ لینے کے بعد باضابطہ اعلان کیا جائے گا۔ غیر ملکی سرمایہ کاروں کی دلچسپی کے باعث پی سی بی پرامید ہے کہ فرنچائز کی نیلامی کامیاب رہے گی۔

واضح رہے کہ حالیہ آکشن میں پی سی بی نے پی ایس ایل کی دو نئی ٹیمیں فروخت کی ہیں، جس کے بعد پی ایس ایل 11 میں ٹیموں کی تعداد آٹھ ہو گئی ہے، جن میں حیدر آباد اور سیالکوٹ کی ٹیمیں بھی شامل ہوں گی، جبکہ ملتان سلطانز بھی اب نیلامی کے مرحلے میں داخل ہونے جا رہی ہے۔