واشنگٹن(رم نیوز)امریکی صدر ڈونلڈ ٹرمپ نے ایران کے خلاف سخت معاشی اقدامات کرتے ہوئے ایران کے ساتھ تجارت کرنے والے ممالک پر 25 فیصد اضافی ٹیرف عائد کرنے کا اعلان کر دیا ہے۔صدر ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ اضافی ٹیرف کا اطلاق فوری طور پر نافذ العمل ہوگا اور اس فیصلے میں کسی قسم کی تبدیلی نہیں کی جائے گی۔ ان کا کہنا تھا کہ یہ فیصلہ حتمی ہے۔

غیر ملکی خبر رساں ادارے کے مطابق یہ اعلان ایسے وقت میں سامنے آیا ہے جب امریکی صدر ایران کے خلاف بارہا سخت بیانات دے چکے ہیں اور خبردار کر چکے ہیں کہ امریکا کے پاس ایران کے خلاف انتہائی سخت آپشنز موجود ہیں، جن میں فوجی کارروائی بھی شامل ہے۔ امریکی حکام کے مطابق واشنگٹن ایرانی اپوزیشن رہنماؤں سے بھی رابطے میں ہے۔

دوسری جانب ایران کے وزیر خارجہ عباس عراقچی نے کہا ہے کہ ایران امریکہ کی جانب سے موصول ہونے والی تجاویز کا تفصیلی جائزہ لے رہا ہے، جبکہ امریکی خصوصی نمائندے اسٹیو وٹکوف کے ساتھ رابطے بدستور جاری ہیں۔عباس عراقچی نے امریکی صدر کے اس انتباہ پر ردعمل دیتے ہوئے کہا کہ احتجاج کے خونریز ہونے کی صورت میں فوجی کارروائی کی دھمکی دراصل شدت پسند عناصر کو اکسانے کے مترادف ہے۔

واضح رہے کہ ایران میں حکومت مخالف مظاہرے مسلسل جاری ہیں، جبکہ ایک امریکی انسانی حقوق تنظیم کے مطابق گزشتہ دو ہفتوں کے دوران ان مظاہروں میں 490 افراد ہلاک ہو چکے ہیں۔