واشنگٹن(رم نیوز)وائٹ ہاؤس نے کہا ہے کہ امریکی صدر ڈونلڈ ٹرمپ ایران کی موجودہ صورتحال پر مسلسل نظر رکھے ہوئے ہیں اور ایران سے متعلق تمام ممکنہ آپشنز بدستور کھلے ہیں۔ ترجمان کیرولائن لیویٹ نے پریس بریفنگ میں بتایا کہ صدر ٹرمپ اور ان کی ٹیم نے ایران میں مظاہرین کی ہلاکتوں کے سلسلے کے پیش نظر تہران کو سنگین نتائج سے خبردار کیا ہے۔

ترجمان کے مطابق امریکی اقدامات کے نتیجے میں ایران میں 800 افراد کی سزائے موت روکی گئی جبکہ ایران پر اقتصادی دباؤ بڑھانے کا عمل بھی جاری ہے۔برطانوی اخبار دی ٹیلی گراف کے مطابق صدر ٹرمپ نے ایران پر ممکنہ حملے سے متعلق اپنا فیصلہ تبدیل کیا، اور اس تبدیلی میں خلیجی ممالک کی سفارتی کوششوں نے اہم کردار ادا کیا۔وائٹ ہاؤس نے اس موقع پر زور دیا کہ امریکہ ایران کے معاملات میں سخت مؤقف اختیار کرنے کے لیے تیار ہے لیکن فی الوقت ہر اقدام پر سوچ سمجھ کر قدم اٹھایا جا رہا ہے۔