اسلام آباد(رم نیوز)پاکستان ٹیلی کمیونی کیشن اتھارٹی (پی ٹی اے) نے کہا ہے کہ درآمدی اور استعمال شدہ موبائل فونز پر ٹیکس میں کمی کسٹمز کے فیصلے کے تحت کی گئی ہے، پی ٹی اے کے پاس ٹیکس میں کمی یا اضافہ کرنے کا اختیار نہیں ہے۔

ذرائع کے مطابق ٹیکس جمع ہونے کا نظام مکمل طور پر آن لائن ہے اور فون نیٹ ورک سے کنفرم ہونے کے بعد فعال ہوتا ہے۔ جعلی آئی ایم ای آئی والے موبائل فونز فوری طور پر ڈی آئی آر بی ایس سسٹم میں فلیگ ہو جاتے ہیں۔

ڈائریکٹوریٹ آف کسٹمز نے 62 مختلف ماڈلز کی کسٹم ویلیو میں تبدیلی کی ہے، جس میں زیادہ تر برانڈز کی قیمت کم کی گئی ہے۔ اس اقدام سے طلبہ، فری لانسرز اور کم آمدنی والے صارفین کو ریلیف ملے گا اور استعمال شدہ فونز کی قیمتیں بین الاقوامی ری سیل ریٹس کے مطابق مقرر کی گئی ہیں۔