لاہور(رم نیوز)سیشن کورٹ لاہور نے آن لائن جوئے کی ایپلی کیشنز کی تشہیر (پرموشن) کے الزام میں نامزد معروف ٹک ٹاکرز رجب بٹ اور ندیم مبارک عرف نانی والا کی عبوری ضمانت میں 16 فروری تک توسیع کر دی ہے۔

ایڈیشنل سیشن جج منصور احمد قریشی نے درخواستوں پر سماعت کی۔ دونوں ملزمان ضمانت کی میعاد ختم ہونے پر عدالت میں پیش ہوئے۔ نیشنل سائبر کرائم انویسٹی گیشن ایجنسی نے مقدمے کا ریکارڈ عدالت میں پیش کیا۔ تفتیشی افسر نے عدالت کو آگاہ کیا کہ کیس کی تفتیش ابھی مکمل نہیں ہوئی، جس کے لیے مزید وقت درکار ہے۔

عدالت نے تفتیشی ایجنسی کی استدعا اور حالات کو مدنظر رکھتے ہوئے ملزمان کی حاضری مکمل کارروائی اور ان کی عبوری ضمانت میں فروری کے وسط تک توسیع کا حکم جاری کیا۔