کوئٹہ(رم نیوز)ریلوے حکام نے کوئٹہ سے ملک کے دیگر حصوں کے لیے ٹرین سروس کو "ناگزیر وجوہات" کی بنا پر فوری طور پر معطل کرنے کا اعلان کر دیا ہے۔

ریلوے ذرائع کے مطابق، کوئٹہ سے پشاور کے درمیان چلنے والی جعفر ایکسپریس اور چمن کے لیے روانہ ہونے والی چمن ٹرین کو منسوخ کر دیا گیا ہے۔ حکام نے مزید بتایا کہ اندرونِ ملک سے کوئٹہ آنے والی جعفر ایکسپریس کو اب کوئٹہ نہیں لایا جائے گا، بلکہ اسے جیکب آباد کے مقام پر روک کر وہیں سے واپس روانہ کر دیا جائے گا۔

واضح رہے کہ ٹرین سروس کی یہ معطلی ایک ایسے وقت میں سامنے آئی ہے جب کوئٹہ کے علاقے سریاب میں سی ٹی ڈی (CTD) نے ایک بڑی کارروائی کرتے ہوئے 4 مبینہ دہشت گردوں کو ہلاک کیا ہے۔ اگرچہ ریلوے حکام نے باضابطہ طور پر کسی خطرے کا ذکر نہیں کیا، تاہم عوامی سطح پر اسے امن و امان کی موجودہ صورتحال سے جوڑا جا رہا ہے۔ ٹرینوں کی اچانک بندش کی وجہ سے مسافروں کی بڑی تعداد اسٹیشن پر پھنس گئی ہے، جنہیں شدید مشکلات کا سامنا ہے۔