لاہور(رم نیوز) زندہ دلانِ لاہور کے لیے بسنت 2026 رنگوں کے ساتھ ساتھ بڑی آسانیاں بھی لے آئی ہے۔ حکومت نے بسنت فیسٹیول کے ایام میں شہریوں کو ٹریفک کے ازدحام سے بچانے اور محفوظ سفر فراہم کرنے کے لیے لاہور کی تمام بڑی سفری سروسز پر کرایہ مکمل طور پر ختم کرنے کا اعلان کر دیا ہے۔

حکومتی فیصلے کے تحت، بسنت کی تقریبات کے دوران درج ذیل سروسز شہریوں کو بلامعاوضہ سفری سہولت فراہم کریں گی۔

اورنج لائن میٹرو ٹرین: شہر کے ایک کونے سے دوسرے کونے تک تیز رفتار اور مفت سفر

میٹرو بس سروس: فیروز پور روڈ سے شاہدرہ تک تمام سٹیشنز پر کوئی ٹکٹ نہیں لگے گا۔

سپیڈو اور الیکٹرک بسیں: فیڈر روٹس پر چلنے والی تمام سرکاری بسیں بھی مفت دستیاب ہوں گی۔

محکمہ ٹرانسپورٹ کے حکام کا کہنا ہے کہ اس اقدام کا بنیادی مقصد بسنت کے دوران سڑکوں پر نجی گاڑیوں اور موٹر سائیکلوں کے دباؤ کو کم کرنا ہے۔مفت سفر کی وجہ سے شہری اپنی گاڑیاں گھر چھوڑ کر عوامی ٹرانسپورٹ استعمال کریں گے، جس سے ٹریفک جام کے مسائل پیدا نہیں ہوں گے۔

موٹر سائیکل سواروں کو میٹرو اور ٹرین کی طرف راغب کر کے سڑکوں پر ڈور سے ہونے والے حادثات کے خطرے کو کم سے کم کیا جا رہا ہے۔حکومت چاہتی ہے کہ ہر طبقے کا شہری بلا خوف و خطر اور بغیر کسی مالی بوجھ کے بسنت کی ان تاریخی تقریبات کا حصہ بن سکے۔