کولمبو (رم نیوز)آئی سی سی مینز ٹی 20 ورلڈ کپ 2026 کے گروپ اے کا ایک اہم اور فیصلہ کن معرکہ آج پاکستان اور نمیبیا کے درمیان کولمبو میں کھیلا جائے گا۔ قومی ٹیم کے لیے یہ میچ سپر ایٹ مرحلے تک رسائی کے لیے حتمی رکاوٹ ثابت ہو رہا ہے، جہاں اسے ٹورنامنٹ میں بقا کے لیے ہر صورت میں بہتر نتائج کی ضرورت ہے۔
کوالیفیکیشن کی صورتحال اور بارش کا کردار محکمہ موسمیات نے آج کولمبو میں 50 سے 60 فیصد بارش کی پیش گوئی کی ہے، جو میچ کے نتائج پر اثر انداز ہو سکتی ہے۔ دلچسپ بات یہ ہے کہ اگر بارش کی وجہ سے میچ منسوخ ہو جاتا ہے تو دونوں ٹیموں کو ایک ایک پوائنٹ ملے گا، جس کے نتیجے میں پاکستان کے مجموعی پوائنٹس 5 ہو جائیں گے اور وہ باآسانی اگلے مرحلے (سپر ایٹ) کے لیے کوالیفائی کر لے گا۔
پوائنٹس ٹیبل پر پوزیشن پاکستان اس وقت گروپ اے میں تین میچز کھیل کر دو فتوحات اور ایک شکست کے ساتھ تیسرے نمبر پر براجمان ہے۔اگر نمیبیا نے پاکستان کو اپ سیٹ شکست دے دی، تو امریکہ کی ٹیم 4 پوائنٹس اور بہتر رن ریٹ کی بنیاد پر پاکستان کو ٹورنامنٹ سے باہر کر کے سپر ایٹ میں جگہ بنا لے گی۔
ماضی کی کارکردگی پر ایک نظر پاکستان نے ٹورنامنٹ کا آغاز نیدرلینڈز کے خلاف 3 وکٹوں کی سنسنی خیز فتح سے کیا تھا، جس میں فہیم اشرف کی 29 رنز کی جارحانہ اننگز نے کلیدی کردار ادا کیا۔ اس کے بعد پاکستان نے امریکا کو 32 رنز سے شکست دے کر اپنی پوزیشن مستحکم کی، تاہم 15 فروری کو بھارت کے ہاتھوں 61 رنز کی بدترین شکست نے پاکستان کے رن ریٹ اور نفسیاتی برتری کو شدید نقصان پہنچایا ۔آج کولمبو میں موسم ابر آلود رہنے کے ساتھ ساتھ 19 کلومیٹر فی گھنٹہ کی رفتار سے ہوائیں چلنے کا امکان ہے۔ شائقینِ کرکٹ کی نظریں آسمان پر جمی ہیں کہ آیا میچ مکمل ہو پائے گا یا قدرت پاکستان کی مدد کرے گی۔
