کولمبو (رم نیوز) آئی سی سی ٹی ٹوئنٹی ورلڈ کپ کے سنسنی خیز سپر ایٹ مرحلے کا آج سے آغاز ہو رہا ہے، جہاں پہلے ہی میچ میں کرکٹ کی دو بڑی ٹیمیں، پاکستان اور نیوزی لینڈ، سری لنکا کے دارالحکومت کولمبو میں آمنے سامنے ہوں گی۔ سیمی فائنل کی دوڑ میں شامل ہونے کے لیے دونوں ٹیموں کے درمیان یہ مقابلہ انتہائی اہمیت کا حامل قرار دیا جا رہا ہے۔

پاکستان اور نیوزی لینڈ کے درمیان یہ اہم میچ کولمبو میں مقامی وقت کے مطابق شام ساڑھے چھ بجے شروع ہوگا۔ شائقینِ کرکٹ ایک کانٹے دار مقابلے کی توقع کر رہے ہیں کیونکہ دونوں ٹیمیں گروپ مرحلے میں بہترین فارم کا مظاہرہ کرتے ہوئے یہاں تک پہنچی ہیں۔ذرائع کے مطابق، نیوزی لینڈ کے خلاف میچ کے لیے پاکستان کی فائنل الیون میں دو اہم تبدیلیوں کا قوی امکان ہے۔فخر زمان، جارح مزاج اوپنر کی واپسی متوقع ہے تاکہ بیٹنگ لائن کو استحکام مل سکے۔ابرار احمد، لیگ سپنر کو ٹیم میں شامل کیے جانے کا امکان ہے تاکہ کولمبو کی کنڈیشنز کا فائدہ اٹھایا جا سکے۔