لاہور(رم نیوز)عید الفطر کا دوسرا روز بھی لاہوریوں کے لیے بھرپور خوشیاں اور گہما گہمی لے کر آیا ہے۔لاہور میں عید کے دوسرے دن کا سورج لذیذ پکوانوں کی خوشبو کے ساتھ طلوع ہوا۔ شہریوں کی بڑی تعداد نے گھروں کے بجائے بازاروں کا رخ کیا، جہاں بونگ پائے، نہاری، چنے کوفتہ اور گرما گرم حلوہ پوری کے سٹالز پر تل دھرنے کی جگہ نہ تھی۔

شہریوں کا کہنا ہے کہ عید کی اصل خوشی دوستوں اور گھر والوں کے ساتھ مل کر ایسے روایتی ناشتوں میں ہی چھپی ہے۔ عزیز و اقارب کے گھروں میں دعوتوں کا سلسلہ عروج پر ہے، جہاں لذیذ گھر کے بنے پکوانوں سے مہمانوں کی تواضع کی جا رہی ہے۔

خواتین اور بزرگوں نے بھی اپنی اپنی منڈلیاں جما رکھی ہیں، جہاں عید کی گپ شپ اور پرانی یادیں تازہ کی جا رہی ہیں۔ بچوں اور نوجوانوں کے لیے عید کا دوسرا دن آؤٹنگ کے نام رہا۔ شہر کے بڑے پارکوں میں غیر معمولی رش ہے۔مجموعی طور پر، لاہور کی عید کا دوسرا دن میل ملاپ، لذیذ کھانوں اور اپنوں کے ساتھ گزارے گئے خوبصورت لمحات کا حسین امتزاج ثابت ہو رہا ہے۔