کراچی (رم نیوز)ندا یاسر کا 'عید سپیشل لُک' سوشل میڈیا پر وائرل ہوگیا لیکن اس سپیشل لک کو مداحوں کی کڑی تنقید اور ملا جلا ردِعمل کا سامنا بھی رہا۔ پاکستان کی مشہور مارننگ شو ہوسٹ ندا یاسر اپنے حالیہ عید ٹرانسمیشن لُک کی وجہ سے ایک بار پھر سوشل میڈیا پر بحث کا مرکز بن گئی ہیں، جہاں صارفین کی بڑی تعداد نے ان کے منفرد انداز کو تنقید کا نشانہ بنایا ہے۔ تقریباً 19 برس سے ٹی وی سکرین پر راج کرنے والی ندا یاسر نے اپنی عید نشریات کے لیے ایک روایتی مگر بھاری انداز اپنایا۔

انہوں نے سرخ رنگ کا ریشمی جوڑا زیب تن کیا۔ سنہرے رنگ کے بھاری زیورات، ماتھا ٹِکا اور ہیڈ جیولری کا انتخاب کیا۔ بالوں کو وِگ کی مدد سے ایک اونچے 'بن' (Bun) کی شکل دی گئی، جو توجہ کا خاص مرکز رہا۔ ندا یاسر کے اس انداز پر سوشل میڈیا صارفین نے مختلف تبصرے کیے، جن میں سے زیادہ تر تنقیدی نوعیت کے تھے۔

کئی صارفین نے وِگ کے استعمال اور ہیئر سٹائل کو "غیر فطری" اور ٹی وی نشریات کے لیے "نامناسب" قرار دیا۔ کچھ صارفین کا موقف تھا کہ ندا یاسر کو اپنی عمر اور شخصیت کے مطابق سادہ فیشن اپنانا چاہیے، جبکہ بعض نے اسے "حد سے زیادہ نمائش" قرار دیا۔جہاں ایک طرف تنقید کا طوفان تھا، وہیں کچھ مداحوں نے ندا یاسر کا دفاع بھی کیا۔