لکی مروت (رم نیوز) خیبر پختونخوا کے ضلع لکی مروت میں دہشت گردوں نے پولیس کی گشت کرنے والی گاڑی کو نشانہ بنایا ہے، جس کے نتیجے میں ایک افسر سمیت 5 پولیس اہلکار شدید زخمی ہو گئے ہیں۔ دھماکے کے بعد علاقے میں خوف و ہراس پھیل گیا اور سکیورٹی ہائی الرٹ کر دی گئی ہے۔ پولیس ذرائع کے مطابق یہ افسوسناک واقعہ لکی مروت کے علاقے شہباز خیل اڈہ کے قریب پیش آیا۔

دہشت گردوں نے سڑک کنارے کھڑی ایک موٹر سائیکل میں بارودی مواد نصب کر رکھا تھا، جسے پولیس موبائل کے قریب پہنچتے ہی ریموٹ کنٹرول کے ذریعے اڑا دیا گیا۔ دھماکے کی زد میں آکر ایک اے ایس آئی سمیت مجموعی طور پر 5 اہلکار زخمی ہوئے ہیں۔ زخمیوں کو فوری طور پر قریبی ہسپتال منتقل کر دیا گیا ہے، جہاں ڈاکٹرز ان کی جان بچانے کی کوشش کر رہے ہیں۔

دھماکہ اتنا زوردار تھا کہ پولیس کی موبائل گاڑی کو شدید نقصان پہنچا ہے۔ واقعے کی اطلاع ملتے ہی پولیس اور سکیورٹی فورسز کی بھاری نفری جائے وقوعہ پر پہنچ گئی اور پورے علاقے کو گھیرے میں لے کر سیل کر دیا گیا۔ شواہد اکٹھے کرنے کے بعد شرپسندوں کی تلاش کے لیے علاقے میں بڑے پیمانے پر سرچ آپریشن شروع کر دیا گیا ہے۔