کراچی (رم نیوز) چیئرمین پاکستان کرکٹ بورڈ (پی سی بی) محسن نقوی نے پاکستان سپر لیگ کے گیارہویں ایڈیشن میں شریک کھلاڑیوں اور آفیشلز کی حوصلہ افزائی کے لیے کراچی کے ساحل پر ایک پروقار عشائیے کا اہتمام کیا۔دو دریا پر ڈنر اور خوشگوار ماحول چیئرمین پی سی بی محسن نقوی نے پی ایس ایل 11 کی تمام ٹیموں کے کرکٹرز اور کوچنگ اسٹاف کو کراچی کے مشہور ساحلی تفریحی مقام 'دو دریا' پر واقع ریستوران میں دعوت دی۔ عشائیے کے دوران خوشگوار گفتگو کا سلسلہ جاری رہا، جس میں مقامی اور غیر ملکی کھلاڑیوں نے کراچی کے روایتی کھانوں اور سمندری نظاروں کا بھرپور لطف اٹھایا۔

ساحلِ سمندر پر پکنک اور والی بال کا مقابلہ عشائیے سے قبل کھلاڑیوں نے کراچی کے ساحل پر اپنی تفریحی سرگرمیاں بھی جاری رکھیں۔ چند روز پہلے ملتان سلطانز اور اسلام آباد یونائیٹڈ کے کھلاڑیوں نے ٹرٹل بیچ کا رخ کیا اور وہاں پکنک منائی۔ اس موقع پر دونوں ٹیموں کے درمیان والی بال کا ایک دلچسپ مقابلہ بھی ہوا جس میں کھلاڑیوں نے بھرپور جوش و خروش دکھایا۔ گھڑ سواری اور جیٹ اسکی کی سیر کرکٹرز نے گراؤنڈ سے باہر بھی اپنی فٹنس اور تفریح کو برقرار رکھا۔

کھلاڑیوں نے ساحل پر گھڑ سواری کی اور جیٹ اسکی کے ذریعے سمندر کی لہروں کا مقابلہ کیا۔ چیئرمین پی سی بی کی جانب سے اس عشائیے کا مقصد کھلاڑیوں کو ٹورنامنٹ کے مصروف شیڈول سے تھوڑا وقفہ دے کر ذہنی طور پر تروتازہ کرنا تھا، تاکہ وہ ایونٹ کے بقیہ میچوں میں بہترین کارکردگی کا مظاہرہ کر سکیں۔