اسلام آباد (رم نیوز) وفاقی حکومت کی جانب سے اسلام آباد میں کام کے طریقہ کار میں تبدیلی کے بعد الیکشن کمیشن آف پاکستان نے بھی آج کی تمام عدالتی کارروائی روکنے کا فیصلہ کیا ہے۔الیکشن کمیشن کی جانب سے جاری کردہ ہنگامی اعلامیے کے مطابق، آج سماعت کے لیے مقرر تمام مقدمات کو ڈی لسٹ کر دیا گیا ہے۔ کمیشن کے روبرو پیش ہونے والے فریقین اور وکلاء کو ہدایت کی گئی ہے کہ وہ آج سماعت کے لیے تشریف نہ لائیں

الیکشن کمیشن کے ترجمان کا کہنا ہے کہ ملتوی کیے گئے مقدمات کی سماعت اب نئی تاریخوں پر ہوگی، جس کا شیڈول جلد جاری کیا جائے گا۔ تمام فریقین کو ان کے مقدمات کی آئندہ تاریخوں کے بارے میں باضابطہ طور پر آگاہ کیا جائے گا۔ یہ فیصلہ وفاقی حکومت کی اس پالیسی کے تسلسل میں سامنے آیا ہے جس کے تحت آج ریڈ زون میں واقع تمام وفاقی دفاتر کو 'ورک فرام ہوم' پر منتقل کیا گیا ہے۔ چونکہ الیکشن کمیشن کا مرکزی دفتر بھی ریڈ زون کے قریب واقع ہے اور وہاں سیکیورٹی کے غیر معمولی انتظامات کیے گئے ہیں، اس لیے فریقین کی رسائی اور انتظامی سہولت کو مدِ نظر رکھتے ہوئے سماعتیں ملتوی کی گئی ہیں۔