اسلام آباد(رم نیوز)ایرانی وزیر خارجہ عباس عراقچی ایک اہم سفارتی مشن پر وفد کے ہمراہ پاکستان کے دارالحکومت پہنچ گئے ہیں۔ نور خان ایئرپورٹ پر لینڈنگ کے بعد ایرانی وفد نے اپنی سفارتی سرگرمیوں کا آغاز کر دیا ہے، جہاں علاقائی سیکیورٹی اور دوطرفہ تعلقات پر اہم بات چیت متوقع ہے۔

ذرائع کے مطابق عباس عراقچی اپنے اس مختصر قیام کے دوران درج ذیل اہم ملاقاتیں کریں گے۔وزیر اعظم شہباز شریف سے ملاقات کر کے علاقائی صورتحال پر تبادلہ خیال کریں گے۔نائب وزیر اعظم و وزیر خارجہ اسحاق ڈار کے ساتھ تفصیلی مذاکرات ہوں گے جن میں پاک ایران تعاون اور تجارتی امور زیرِ بحث آئیں گے۔ ایرانی وزیر خارجہ کی ٹیم میں شامل ماہرین اس دورے کو خطے میں جاری کشیدگی اور سفارتی تعاون کے حوالے سے انتہائی اہم قرار دے رہے ہیں۔ عباس عراقچی آج رات پاکستان میں قیام کریں گے اور متوقع طور پر ہفتے کی دوپہر یہاں سے روانہ ہوں گے۔ پاکستان کا دورہ مکمل کرنے کے بعد ایرانی وزیر خارجہ کا اگلا پڑاؤ مسقط (عمان) اور پھر ماسکو (روس) ہوگا، جہاں وہ اپنی علاقائی اور بین الاقوامی مشاورت کا سلسلہ جاری رکھیں گے۔