لاہور(ر م نیوز) رواں ہفتے کے اختتام پر سٹیٹ بینک، تمام کمرشل بینکوں، سٹاک ایکسچینج اور سرکاری دفاتر میں مسلسل تین روز کی تعطیلات ہوں گی۔ سرکاری اعلامیے کے مطابق یکم مئی (جمعہ) کو 'یوم مزدور' کے موقع پر سٹیٹ بینک اور ملک بھر میں اس کے تمام ذیلی دفاتر بند رہیں گے۔ اس کے علاوہ پاکستان سٹاک ایکسچینج میں بھی کسی قسم کی تجارتی سرگرمی نہیں ہوگی اور تمام سرکاری دفاتر میں عام تعطیل ہوگی۔

رواں سال یکم مئی جمعہ کے روز آنے کی وجہ سے بینک اور سرکاری ملازمین کو طویل ویک اینڈ میسر آئے گا۔ جمعہ کی سرکاری تعطیل کے بعد ہفتہ اور اتوار کو معمول کی ہفتہ وار چھٹی ہوتی ہے، جس کے باعث مالیاتی ادارے اور دفاتر اب مسلسل تین دن بند رہنے کے بعد پیر کے روز دوبارہ کھلیں گے۔ شہریوں کو مشورہ دیا گیا ہے کہ وہ نقد رقم کی منتقلی، چیک بک کے حصول اور دیگر ضروری بینکنگ امور جمعرات تک مکمل کر لیں تاکہ کسی بھی قسم کی دشواری سے بچا جا سکے۔ تاہم، تعطیلات کے دوران تمام بینکوں کی اے ٹی ایم سروسز اور آن لائن بینکنگ ایپس معمول کے مطابق دستیاب رہیں گی۔