اسلام آباد(رم نیوز) پاکستان نے امریکی نیوز چینل 'سی بی ایس' کی اس رپورٹ کو سختی سے مسترد کر دیا ہے جس میں نور خان ایئربیس پر ایرانی طیاروں کی موجودگی کو کسی فوجی تناظر میں پیش کرنے کی کوشش کی گئی تھی۔ ترجمان دفترِ خارجہ نے ایسی خبروں کو من گھڑت، سنسنی خیز اور حقائق کے برعکس قرار دیا ہے۔ وزارتِ خارجہ نے واضح کیا ہے کہ جنگ بندی کے دوران اور اسلام آباد مذاکرات کے ابتدائی مراحل میں ایران اور امریکہ، دونوں ممالک کے متعدد طیارے پاکستان آئے تھے۔ ان طیاروں کا مقصد مذاکراتی عمل سے وابستہ سفارتی عملے، سکیورٹی ٹیموں اور انتظامی سٹاف کو لاجسٹک سہولیات فراہم کرنا تھا۔
بیان میں مزید کہا گیا کہ کچھ طیارے اور معاون عملہ آئندہ کے ممکنہ مذاکراتی ادوار کی توقع میں عارضی طور پر پاکستان میں ٹھہرا ہوا ہے۔ دفترِ خارجہ کے مطابق پاکستان کا کردار ایک غیر جانبدار اور ذمہ دار سہولت کار کا ہے، اور ان طیاروں کا کسی بھی قسم کی فوجی ہنگامی صورتحال یا حفاظتی اقدامات سے کوئی تعلق نہیں ہے۔ ترجمان دفترِ خارجہ نے خدشہ ظاہر کیا کہ اس نوعیت کا گمراہ کن بیانیہ بظاہر خطے میں امن اور استحکام کے لیے جاری کوششوں کو نقصان پہنچانے کے لیے گھڑا گیا ہے۔
انہوں نے واضح کیا کہ ایرانی وزیرِ خارجہ کے دوروں اور دیگر سفارتی روابط کو موجودہ انتظامی سہولیات کے تحت ہی ممکن بنایا گیا ہے اور اس حوالے سے تمام فریقوں کے ساتھ مکمل شفافیت برقرار رکھی گئی ہے۔ پاکستان نے اعادہ کیا ہے کہ وہ عالمی اور علاقائی سطح پر کشیدگی میں کمی اور بامعنی مذاکرات کے لیے اپنی کوششیں جاری رکھے گا اور کسی بھی فریق کو اپنی سرزمین سے متعلق بے بنیاد قیاس آرائیاں پھیلانے کی اجازت نہیں دی جائے گی۔
