واشنگٹن / تہران(رم نیوز) مشرقِ وسطیٰ میں جاری جنگ کے دوران امریکہ اور ایران کے درمیان براہِ راست فضائی معرکہ آرائی تیز ہو گئی ہے، جس کے باعث خطے میں شدید ہیجان پیدا ہو گیا ہے۔ امریکی سینٹرل کمانڈ (CENTCOM) کے مطابق امریکی لڑاکا طیاروں نے ایران کے شہر گورُک اور جزیرہ قشم میں ایرانی ریڈار اور ڈرون کمانڈ اینڈ کنٹرول سینٹرز کو کامیابی سے نشانہ بنایا۔ یہ کارروائی بین الاقوامی پانیوں میں امریکی MQ-1 ڈرون گرائے جانے کے جواب میں کی گئی۔

ایرانی پاسدارانِ انقلاب (IRGC) نے جوابی وار کرتے ہوئے اس امریکی فضائی اڈے پر حملہ کیا جہاں سے جنوبی ایران (جزیرہ سیریک) کے ایک مواصلاتی ٹاور کو نشانہ بنایا گیا تھا۔ ایران کا دعویٰ ہے کہ انہوں نے اپنے تمام مقررہ اہداف تباہ کر دیے ہیں۔ اس تصادم کے نتیجے میں پڑوسی ملک کویت میں خطرے کے سائرن بج اٹھے۔ کویتی فوج کے جنرل اسٹاف نے تصدیق کی ہے کہ ان کا فضائی دفاعی نظام (Air Defense) متحرک ہو کر آنے والے میزائلوں اور ڈرون حملوں کو فضا میں ہی ناکام بنا رہا ہے۔