کراچی (رم نیوز) وفاقی وزیر بحری امور محمد جنید انوار چوہدری نے کراچی پورٹ ٹرسٹ کی حدود میں ایک جدید اور بین الاقوامی معیار کا 'میری ٹائم بزنس ڈسٹرکٹ' قائم کرنے کا باقاعدہ اعلان کیا ہے۔ اس سلسلے میں کراچی پورٹ ٹرسٹ اور سعودی عرب کے سرمایہ کار شراکت داروں کے مابین ایک تاریخی مفاہمتی یادداشت پر دستخط کر دیے گئے ہیں۔ وزارتِ بحری امور کی جانب سے جاری کردہ تفصیلات کے مطابق، یہ جدید بزنس ڈسٹرکٹ کراچی میں 140 ایکڑ اراضی پر تعمیر کیا جائے گا۔

وزیرِ بحری امور جنید انوار چوہدری کا کہنا ہے کہ اس عظیم الشان منصوبے کا بنیادی ہدف پاکستان کو علاقائی بحری تجارت اور سرمایہ کاری کا محور بنانا ہے، جس سے ملک کی 'بلیو اکانومی' (بحری معیشت) کو زبردست تقویت ملے گی۔ انہوں نے مزید بتایا کہ اس منصوبے کے ذریعے ملک میں بڑے پیمانے پر غیر ملکی سرمایہ کاری آئے گی اور مقامی سطح پر روزگار کے ہزاروں نئے مواقع پیدا ہوں گے۔ حکومت کی جانب سے یقین دہانی کرائی گئی ہے کہ منصوبے کی بروقت تکمیل کے لیے تمام قانونی اور انتظامی تقاضے ترجیحی بنیادوں پر پورے کیے جائیں گے۔ واضح رہے کہ سعودی عرب کے اعلیٰ سطحی وفد نے پاکستان کے بندرگاہی انفراسٹرکچر اور لاجسٹکس کے شعبے میں گہری دلچسپی کا اظہار کرتے ہوئے اس شراکت داری کو آگے بڑھایا ہے۔