واشنگٹن (رم نیوز) ایران کے ساتھ حالیہ عسکری تناؤ اور خطے کے حساس سکیورٹی ماحول کو مدنظر رکھتے ہوئے امریکہ نے مشرقِ وسطیٰ کے ممالک کے لیے نئی اور سخت سفری ہدایات جاری کر دی ہیں۔ امریکی حکومت نے وہاں موجود اپنے شہریوں کو انتہائی الرٹ رہنے اور غیر ضروری طور پر باہر نکلنے سے منع کیا ہے۔ امریکی محکمہ خارجہ کی جانب سے جاری کردہ الرٹ کے مطابق، خطے کی سکیورٹی صورتحال انتہائی غیر یقینی ہے اور اس میں کسی بھی وقت اچانک تبدیلی آ سکتی ہے۔

نئی گائیڈ لائنز کے تحت ایران، عراق، شام، لبنان، یمن اور غزہ کو خطرناک ترین ممالک قرار دیتے ہوئے لیول 4 (سفر نہ کرنے) کی سخت ترین ہدایت برقرار رکھی گئی ہے۔ اس کے ساتھ ہی سعودی عرب، متحدہ عرب امارات (یو اے ای)، کویت، قطر، بحرین، اردن اور اسرائیل جیسے ممالک کے لیے لیول 3 (سفر پر نظرثانی کریں) کا الرٹ جاری کیا گیا ہے۔ امریکی حکام نے شہریوں کو ہدایت کی ہے کہ وہ ممکنہ عسکری سرگرمیوں کے پیشِ نظر مقامی خبروں اور سرکاری اعلانات سے مسلسل باخبر رہیں۔