منامہ (رم نیوز) ایران اور عمان نے عالمی سطح پر انتہائی اہمیت کی حامل تجارتی گزرگاہ 'آبنائے ہرمز' کے مستقبل کے انتظامات سنبھالنے کے لیے ایک مشترکہ حکمتِ عملی تیار کرنے پر اتفاق کر لیا ہے۔ ایرانی نائب وزیر خارجہ کاظم غریب آبادی نے تصدیق کی ہے کہ دونوں ممالک نے اس آبی گزرگاہ کے انتظام و انصرام پر تفصیلی بات چیت کی ہے۔ عمان نے ساحلی ملک ہونے کے ناطے یہاں سے گزرنے والے بحری جہازوں پر سروس فیس لاگو کرنے کی تائید کی ہے۔

اس حکمتِ عملی اور بحری راستوں کا حتمی مسودہ تیار کرنے کے لیے دونوں ممالک کے ماہرین آئندہ ایک ہفتے میں خصوصی مذاکرات شروع کریں گے۔ دوسری جانب، آبنائے ہرمز کا کنٹرول ایران اور امریکہ کے درمیان شدید تنازع کی شکل اختیار کر چکا ہے، کیونکہ امریکہ کسی بھی قسم کی اضافی فیس عائد کرنے کی سخت مخالفت کر رہا ہے۔ اگرچہ عمان نے گزشتہ دنوں فیس کے منصوبے سے لاعلمی کا اظہار کرتے ہوئے اقوام متحدہ کی نگرانی میں عارضی بحری راہداری کا اعلان کیا تھا، تاہم ایران کا اصرار ہے کہ صرف اس کی ساحلی پٹی والا راستہ ہی مجاز ہے، اور اس نے دیگر راستے استعمال کرنے والے جہازوں کو نشانہ بھی بنایا ہے۔