اسلام آباد(رم نیوز)پاکستان ٹیلی کمیونیکیشن اتھارٹی (پی ٹی اے) نے ملک بھر میں انٹرنیٹ سروسز کی مکمل بحالی کا اعلان کر دیا ہے۔ بین الاقوامی سب میرین کیبل 'ایس ایم ڈبلیو 5' میں پیدا ہونے والی تکنیکی خرابی کو کامیابی سے دور کر دیا گیا ہے، جس کے بعد اب انٹرنیٹ ٹریفک معمول کے مطابق چل رہی ہے۔ تفصیلات کے مطابق، گزشتہ روز SEA-ME-WE 5 انٹرنیٹ کیبل میں اچانک پیدا ہونے والی تکنیکی خرابی کے باعث پاکستان کے مختلف شہروں میں صارفین کو انٹرنیٹ کی رفتار میں شدید کمی اور کنیکٹیویٹی کے مسائل کا سامنا کرنا پڑا تھا۔

انٹرنیٹ کی سروسز پر نظر رکھنے والے عالمی پلیٹ فارم 'ڈاؤن ڈیٹیکٹر' نے بھی متعدد علاقوں سے صارفین کی شکایات کی تصدیق کی تھی، جس کی وجہ سے روزمرہ کی آن لائن سرگرمیاں اور ڈیجیٹل سروسز عارضی طور پر متاثر ہوئیں۔ پی ٹی اے ترجمان کا کہنا ہے کہ متعلقہ ٹیمیں صورتحال پر مسلسل نظر رکھے ہوئے تھیں اور اب مرمتی کام مکمل ہونے کے بعد صارفین کو بغیر کسی رکاوٹ کے بلا تعطل انٹرنیٹ سروس فراہم کی جا رہی ہے۔