بشکیک(رم نیوز) شنگھائی تعاون تنظیم (ایس سی او) کے سربراہی اجلاس کے دوران سفارتی سرگرمیاں جاری ہیں، جہاں اجلاس کے دوسرے روز ایرانی وزیر خارجہ عباس عراقچی نے چین کے وزیر خارجہ وانگ یی اور پاکستان کے نائب وزیراعظم و وزیر خارجہ اسحاق ڈار سے الگ الگ ملاقاتیں کی ہیں۔

ایرانی وزیر خارجہ اور چینی ہم منصب کے درمیان ہونے والی ملاقات میں باہمی دلچسپی کے امور پر تبادلہ خیال کیا گیا، تاہم اس گفتگو کی تفصیلی تفصیلات تاحال جاری نہیں کی گئی ہیں۔ اجلاس کے حاشیے پر ایرانی وزیر خارجہ کی پاکستانی وزیر خارجہ اسحاق ڈار سے بھی ملاقات ہوئی، جس میں دوطرفہ تعلقات پر بات چیت کی گئی۔

واضح رہے کہ شنگھائی تعاون تنظیم کا یہ اہم سربراہ اجلاس کرغزستان کے دارالحکومت بشکیک میں جاری ہے، جس میں پاکستان کے وزیراعظم شہباز شریف، ایرانی صدر مسعود پزشکیان، چینی صدر شی جن پنگ، روسی صدر ولادیمیر پیوٹن اور بھارتی وزیراعظم نریندر مودی سمیت رکن ممالک کے دیگر اعلیٰ رہنما بھی شریک ہیں۔