راولپنڈی (رم نیوز) 6 ستمبر یومِ دفاع و شہدائے پاکستان کے موقع پر مسلح افواج نے مادرِ وطن کے لیے جانیں قربان کرنے والے شہداء کو زبردست خراجِ عقیدت پیش کیا ہے۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر، نیول چیف اور ایئر چیف نے شہدائے پاکستان کو پرخلوص سلام پیش کیا ہے۔ مسلح افواج کی جانب سے اس پُرعزم موقع پر جنگی غازیوں اور شہداء کے عظیم اہلِ خانہ کو بھی خصوصی خراجِ تحسین اور گہرا تشکر پیش کیا گیا۔

آئی ایس پی آر کے جاری کردہ بیان میں کہا گیا ہے کہ 6 ستمبر کا دن قومی اتحاد، جرأت اور آہنی عزم کی لازوال علامت ہے، جب 1965ء کی جنگ میں پاکستانی قوم اپنے وطن کے دفاع کے لیے ایک بار پھر سیسہ پلائی دیوار بن کر دشمن کے سامنے کھڑی ہو گئی تھی۔ شہدائے پاکستان فرض شناسی، غیرت اور لازوال قربانی کی اعلیٰ ترین اقدار کے حقیقی امین ہیں۔ ترجمان پاک فوج کا مزید کہنا تھا کہ میدانِ جنگ، فضاؤں اور سمندروں کے پہرے داروں نے وطن کے تحفظ کے لیے جو عظیم قربانیاں دیں، وہ تاریخ کا روشن باب ہیں۔ اس موقع پر شہداء کے اہلِ خانہ کے صبر، حوصلے اور ثابت قدمی کو بھی سراہا گیا جو ہر کٹھن گھڑی میں عزم و استقلال کی پیکر بنے ہوئے ہیں۔