ریاض(رم نیوز) ترکیہ کے وزیر خارجہ حاقان فیدان "مکہ مشترکہ دفاعی معاہدے" کے تحت قائم سٹریٹجک پولیٹیکل اینڈ ڈیفنس کمیٹی کے اہم اجلاس میں شرکت کے لیے آج سعودی عرب کے دارالحکومت ریاض پہنچ رہے ہیں۔ یہ دفاعی اتحاد رواں سال اگست میں ترکیہ، سعودی عرب اور پاکستان کے درمیان قائم کیا گیا تھا۔ریاض میں ہونے والے اس اعلیٰ سطحی اجلاس میں ترک وزیر خارجہ حاقان فیدان کے ساتھ وزیر دفاع یاشار گولر اور چیف آف جنرل سٹاف جنرل سلجوق بایرکتاروغلو بھی شریک ہوں گے۔
اجلاس کے دوران حاقان فیدان ترکیہ، سعودی عرب اور پاکستان کے مابین سٹریٹجک اور دفاعی تعاون کو مضبوط بنانے میں مکہ معاہدے کے بنیادی کردار پر زور دیں گے۔ ترک وزیر خارجہ مشرق وسطیٰ میں امن و استحکام کو درپیش خطرات کا جائزہ پیش کریں گے اور اس بات کو اجاگر کریں گے کہ اس اتحاد نے قلیل مدت میں جو پیش رفت کی ہے، وہ خطے میں پائیدار امن کے قیام کے لیے بے حد قیمتی ہے۔ رپورٹ کے مطابق حاقان فیدان حالیہ حوثی حملوں کے تناظر میں سعودی عرب کے ساتھ بھرپور یکجہتی کا اعادہ کریں گے اور یہ دوٹوک موقف اپنائیں گے کہ مقدس مقامات کو نشانہ بنانے والے تمام اشتعال انگیز اقدامات کسی صورت ناقابل قبول ہیں۔
