واشنگٹن(رم نیوز) امریکی وزیر خارجہ مارکو روبیو نے کہا ہے کہ ایران کے ساتھ امن معاہدہ طے پانا انتہائی دشوار امر ہے۔ امریکی میڈیا کو انٹرویو دیتے ہوئے انہوں نے انتباہ کیا کہ جب تک تہران آبنائے ہرمز میں تجارتی اور تیل بردار جہازوں کو نشانہ بنانا بند نہیں کرتا، واشنگٹن کی جانب سے ایران پر اقتصادی دباؤ کا سلسلہ جاری رکھا جائے گا۔ مارکو روبیو نے دعویٰ کیا کہ اس اہم آبی گزرگاہ سے تیل کے جہازوں کی آمد و رفت جنگ سے پہلے کی سطح کے 80 فیصد سے زائد ہو چکی ہے، تاہم تہران اس دعوے کی بارہا تردید کر چکا ہے۔ انہوں نے جہاز رانی پر ایرانی حملوں پر گہری تشویش کا اظہار کرتے ہوئے تہران پر زور دیا کہ وہ ان حملوں کو فوری طور پر روکے۔ اس کے ساتھ ہی، امریکی وزیر خارجہ نے پاکستان کے ساتھ سفارتی رابطوں کی ضرورت کو بھی تسلیم کیا۔