نیویارک (رم نیوز)امریکہ میں 3 نومبر کو ہونے والے وسط مدتی انتخابات کے لیے انتخابی مہم اپنے عروج پر ہے۔ یہ انتخابات صدر ڈونلڈ ٹرمپ کے دورِ صدارت کے آخری دو سالوں میں کانگریس کا کنٹرول طے کرنے کے ساتھ ساتھ امریکی سیاست کی آئندہ سمت کا بھی تعین کریں گے۔

رپورٹس کے مطابق اس بار انتخابی میدان کو جن پانچ اہم ترین موضوعات نے سب سے زیادہ گرما رکھا ہے، ان میں سرفہرست بڑھتی ہوئی مہنگائی اور معاشی دباؤ ہے۔ اس کے علاوہ فروری سے جاری ایران کے خلاف جنگ کے نتیجے میں توانائی اور گیس کی قیمتیں، سخت امیگریشن پالیسیاں، حکومتی شفافیت کے معاملات اور مصنوعی ذہانت اور ڈیٹا سینٹرز سے منسلک عوامی خدشات بھی مہم کے مرکزی نکات بنے ہوئے ہیں۔ تجزیہ کاروں کا کہنا ہے کہ ان امور کی وجہ سے رواں انتخابات میں کانگریس کے دونوں ایوانوں پر غلبہ حاصل کرنے کے لیے انتہائی کانٹے کا مقابلہ متوقع ہے۔