مظفر آباد(رم نیوز)آزاد کشمیر میں بلدیاتی انتخابات کا پہلامرحلہ مکمل ہو گیا ہے۔غیر سرکاری نتائج کے مطابق پی ٹی آئی نے آزاد جموں و کشمیر (اے جے کے) میں ہونے والے بلدیاتی انتخابات کے پہلے مرحلے میں ضلع کونسل کی 33 نشستیں جیت لیں ہیں۔
آزاد جموں و کشمیرمیں تین دہائیوں کے وقفے کے بعد ہونے والے بلدیاتی انتخابات میں پی پی پی ضلع کونسل کی 23 نشستیں جیت کر دوسرے نمبر پر رہی۔پاکستان مسلم لیگ ن نے 16 نشستیں حاصل کیں۔وادی نیلم میںپی ٹی آئی نے 7 ،پاکستان مسلم لیگ ن اور پاکستان پیپلز پارٹی نے 3،3 نشستیں حاصل کیں جبکہ 2 نشستیں آزاد امیدواروں نے حاصل کیں۔
پی ٹی آئی نے وادی جہلم میں 10 نشستیں ، پاکستان مسلم لیگ کے حصے میں 5 اور پاکستان پیپلز پارٹی کے حصے میں 3 نشستیں آئیں۔غیر سرکاری نتائج کے مطابق مظفرآباد میونسپل کارپوریشن کے تمام 36 وارڈز میں پاکستان مسلم لیگ ن 12 نشستیں حاصل کر کے سر فہرست رہی جبکہ پاکستان پیپلز پارٹی 8 نشستوں کے ساتھ دوسرے نمبر پر رہی،پی ٹی آئی نے 7 نشستیں حاصل کیں جبکہ آزاد امیدواروں نے بھی 7 نشستیں حاصل کیں۔