برسلز(رم نیوز)وفاقی وزیرِ داخلہ محسن نقوی اور عراقی وزیرِ داخلہ جنرل عبدالامیر الشمری کے درمیان برسلز میں اہم ملاقات ہوئی، جس میں پاک،عراق دوطرفہ تعلقات، سیکیورٹی تعاون اور پاکستانی زائرین کی سہولت کے حوالے سے تفصیلی تبادلہ خیال کیا گیا۔ملاقات میں دونوں ممالک کی وزاراتِ داخلہ نے تعاون کو مزید مؤثر اور پائیدار بنیادوں پر فروغ دینے پر اتفاق کیا۔ عراقی وزیرِ داخلہ نے زائرین گروپس کی منظم ریگولیشن کے لیے پاکستان کی جانب سے کیے گئے اقدامات کو سراہتے ہوئے کہا کہ پہلی بار اس نوعیت کی مؤثر حکمتِ عملی اپنائی گئی ہے۔
عراقی وزیرِ داخلہ نے یقین دہانی کرائی کہ پاکستانی وزارتِ داخلہ کی فراہم کردہ فہرست میں شامل تمام زائرین کو عراق آمد کی اجازت دی جائے گی جبکہ مقررہ مدت سے زائد قیام کی اجازت نہیں دی جائے گی۔محسن نقوی نے کہا کہ زائرین کی بہتر سہولت اور نگرانی کے لیے دونوں ممالک کے متعلقہ ادارے مستقل رابطے میں رہیں گے۔ انہوں نے اس بات پر زور دیا کہ پاکستانی زائرین کی سلامتی، احترام اور سہولت حکومتِ پاکستان کی اولین ترجیح ہے۔
ملاقات میں سیکیورٹی تعاون، انسدادِ دہشت گردی، انسانی سمگلنگ کی روک تھام اور معلومات کے تبادلے کے مشترکہ میکنزم کو مزید مضبوط بنانے پر بھی اتفاق کیا گیا۔اس موقع پر عراقی وزیرِ داخلہ نے جلد پاکستان کے دورے کا اعلان کیا اور کہا کہ آئندہ ملاقات میں زائرین کی سہولت اور دوطرفہ روابط کو مزید مضبوط بنانے کے لیے جامع لائحہ عمل طے کیا جائے گا۔
